Jonah 4

Siona Ien Mikat Iahova Vengan xa Xi Pisen Esaeen mi Elu Nan Xil

Siona 4:1-11

1Melele xa Siona pusi xa Iahova en misae e mol-Nineva xil, xi milonge misa e ien mikat pupu. 2Ma xi misis mi Iahova bit, “O Iahova, melele xa nada tamu e tim savan, nakila ngamu xa xouk upol ni imak. Mak vari iaxa natelesae natehe Spen. Natekila xa xouk obe hisit Hi tei xa di opisen eheien e esaeen mi moletin xil. Xouk di onggur xat ekaten nam e di opisen hosien nam mi moletin xil. Vehakut di obiles nenemien nam tengan onasa pangasien ti mi moletin xil. 3!O Iahova, taxeak, uhur rat meulien navan! !Vahit namat vahos mak mu vali ngan nameul nada xiak!”

 4E Iahova bit rilomun ni mini bit, “?Onemi obit momal tang tengan ti iem vakat vamak?” E Siona tavit rilomun ni ti sepinien mini.

 5Di, Siona be reling taon ak e ba dotan e rute tei xa be ist xa mikila vapus taon tahal Nineva. E inggak, xi pet horao tei e dotan de paen vengan xa bit vapus ti mu naha vaxul mi taon ak.

 6Di, Iahova misak ni uval tei meul katen usil horao xa Siona tepeti tengan vahe memal man e vapol ni xi nalonge ti mun nasa. Ma melele xa Siona pusi, xi besi xi ven. 7E visuvong nen, melele xa ut milan, Hi misa vueang tei mei mingas uval ak, ma uval ak mat. 8E melele xa eai bemei nesao, Hi misa vatiang tei nggo ist xa mitin. Eai minggasil e vat Siona ma ven memel. Ma xi ien bei maten e biteni bit, “!Vahit namat vahos mak mu vali ngan nameul nada xiak!”

 9E Hi biteni mini bit, “?Onemi obit momal tang tengan ti iem vakat vamak ve uval ak?”

E Siona bit, “!Io! Momal tang tengan nalonge vamak. !Ieok mikat pupu ve rin ak! !E vahit namat, vahos mak mu!”

 10Ma Iahova biteni mini bit, “Uval ak meul bemei nesao e vongien tei tang, e mat e vongien sav. Xouk otapol ni ti neta ven, e tave xouk ti iaxa opol ni vameul. Tave ti neta xa mak, e xouk iem misae pupu ve maten nan. 11?Ma midep? ??Tamal ti tengan inou nipisen esaeen navan mi moletin xil tahal Nineva?? !Ngan xil xa di lameul e taon ak lali taosen be handred tei e hanutap tei mun (120,000) e latakil ti vari neta xa bos e neta xa misa! ▼ E vongoro xil mun xa ladi en labe holu pupu. Siona, momal tevi tengan ieok vasae e meulien na moletin xil ak.”

New Testament
Copyright information for TVK